طريقتي في إزالة الشامة (حبة الخال)..طريقة آمنة 100%

تنبيه: لازم نتأكد ان الشامة حميده.. اذا تأكدنا انها حميده بعدها نطبق الطريقة واحنا مرتاحين..

هذا أول موضوع لي في هالقسم.. ويارب يفيدكم..
أنا كنت متضايقه من شامة في جسمي ( حبة الخال).. طبعا غير اللي في وجهي.. وكانت في خشمي وأنا أكرهها خلقه فكيف لو موقعها بايخ كمان.. رحت للدكتوره وعندنا عليهم نصب مو طبيعي تشيلو ليا ع جلسات والجلسة بـ550.. ليزر ع حبة خال قد ايه صغرها بـ550.. ددحين الشعر وكم جلسه يشيلوه بـ300 للأندر آرمز.. ماعجبني السعر وشفتو استغلال.. المهم في يوم تفرجت برنامج دكتورز.. وجات بنت قالت انها تشيل حبوب الخال اللي في جسمها بخل التفاح.. انا هنا مرررره كيفت.. وقال لها الدكتور انو طريقتها آمنه 100% ومامنها أي ضرر..

نجي لطريقتها في وضع خل التفاح.. طبعا ماجابو الطريقة بالتفصيل بس اللي جابوه انها تحط حوالي حبة الخال بعود الأذان فازلين علشان ماتلتهب المنطقة اللي حواليه وبعدها تسمر..وبعدها تحط على حبة الخال بقطنة خل التفاح..

تطبيقي لها.. أنا طبعا صرت آخد قطنة صغيرة ع قد حبة الخال .. حاولوا قد ماتقدروا انها تكون قد حبة الخال.. في البداية حطوا حوالين حبة الخال فازلين.. وع الخال نفسو حطو القطنة اللي على حجمو ومبللة بخل التفاح.. وبعدها حطوا لزق الجروح عليها ع أساس تثبت القطنة ع حبة الخال.. كنت أرجع أبلل القطنة 4 مرات في اليوم لانها تجف واحيان مرتين مره ادا صحيت ومره ادا نمت.. بس الأفضل انو تقريبا 3 مرات في اليوم ترجعوا تبللوا القطنة.. وادا اكتر مو مشكلة..وكمان أول الأيام كنت احيان آخد عود الإدن واحطو في مويه مغلية وافرك فيه الخال والقطنة تكون حااااارة افركوا الين ما احس مو قادره اتحمل الحراره واشيلو وبعدها ارجع افركوا تاني بالعود المبلل بالموية المغلية... بس الطريق هدي اول الايام.. بعدين لما يبدا لون الخال يغمق توقفوها..

بالضبط يابنات والله ماكملت أسبوع الا حبة الخال صارت زي المحروقة ولونها صاار غااااامق انا تفجعت مرره.. بس كم يوم وراحت زي لما تنحرقوا وبعدها الجلد يتسلخ ويصير مكانوا مافي حاجه...

تغيرات فترة العلاج...
فيه حاجات بنلاحظها أثناء استخدامنا لخل التفاح بعد كم يوم.. حيصير مكان الخال مرره يحرق ادا حطيتو الخل عليه.. عادي تحملوا.. شي طبيعي لاتخافوا كم يوم وبعدها حتحصلوا النتيجة اللي ترضيكم..

غلطتي في تطبيق الطريقة:
انا المشكلة اللي صارت معايا اني ماحطيت الفازلين وصار حوالي الخال مأمر سمار لأني ماحطيت الفازلين وسبت المنطقة تلتهب.. وتخلصت من السمار بمقشر بيبي فيس رقم 2 صرت احطو ع السمار وتقشر..

بنات دي طريقتي في حبة الخال بس كانت في جسمي مو في وجهي.. ماجربتها في وجهي خفت انو بشرة الوجه غير.. انصحكم ادا في الوجه تشيلوها عند دكتور..
الطريقة دي ماكتبتها الا لانها شالت لي حبة الخال بجد.. وماضرتني أبدا ولأني تأكدت من دكتوره انها مو مضرة... فبليز اللي تستخدمها وتستفيد تدعي لي..

نجي للأسئلة المتوقعة..
حبة الخال ترجع بعدين أو لأ؟
أنا عن نفسي ليا 6 أشهر ومارجعت ومكانها ماكأنو انخلق فية حبة خال أصلا.. بس غير كدا ما أقدر أجاوبكم..

الطريقة هذي آمنة ومامنها ضرر؟
الدكتور قال انها آمنه 100% بس لازم نكون متأكدين ان الشامه اللي فينا حميده..

خل التفاح كم سعرو؟ ومن فين نشتريه؟ وايش نوعوا؟
سعروا كان بـ20 ريال واشتريتوا من العطار.. وماركتو أبازير..
دي صورتوا..


وبليز اللي تجربها وتفيدها تدعيلي بالهداية والتوفيق في دراستي..
وياليت ادا وحدة جربت تكتب تجربتها..
واعذروني ادا طولت مارديت عليكم.. جاوبت ع الأسئلة المتوقعة قد ما أقدر.. الأيام الجاية عندي امتحانات..
فحدخل بس نادر.. بس اوعدكم حرد عليكم قد ما اقدر..

في أمان الكريم..



فرفوشه العسوله