شهيوات ديال الحوت المعلب

Sanaa Zaim Aswat

السلام عليكم مستمعاتنا و شهية طيبة ليكم ، اليوم في حديث و مغزل مع سناء الزعيم كانو شهيوات ديال الحوت المعلب و متعونا مستمعاتنا بشهيوات مختلفة و هادي البعض منها:

* أمال من مكناس : السردين على شكل طون // نصف كأس زيت ، نصف ملعقة كامون ، 4 ضروس ثومة ، 2 مزيودات و الملح ، نسدو عليه في الكوكوط لمدة 5 دقائق بلا ماء كيجي مقلي و كنوضعوه في علب بالثلاجة .
- و بالنسبة الا بغينا نعملوه بالخضر كنديرو بطاطا مقطعة طريفات صغار ، الجلبانة ، خيزو ، نسلقو كل هاد الخضر نصف سلقة و نزيدو عليهم المعدنوس طري و نضيفو السردين و نخليوهم يطيبو لينا المدة الكافية.

* أم خولة من البيضاء : سردين الطون// 1 كيلو من السردين صغير نحيدو ليه السنسول ، 2 أوراق سيدنا موسى ، معلقة كبيرة من الخل ، نصف كأس زيت العود ، 2 معالق كبار من مطيشة الحك ، 2 خيزويات مقطعين ، 2 مزيودات و شوية الملح ، نستفو دوائر الخيزو ثم نضيفو ليها السردين و أوراق سيدنا موسى و نخليوهم يطيبو مدة 15 دقيقة فوق عافية مهيلة .

* فتيحة من تاونات : طون بالسردين // 1 كيلو سردين مغسول بلا سنسول ، 1 حك صغير مطيشة ، شوية الملح ، نصف كأس زيت رومية ، نصف كأس خل ، كأس ماء و الابزار ، نديرو مطيشة في الكوكوط و نخلطوها مع القوام ثم نرتبو السردين من الفوق و نسدو عليها المدة اللي غادي يطيب فيها الحوت و نوضعوه في علب ثم نوضعوهم في الثلاجة.

* ابتسام من بني ملال : الطون بنكهة الزعتر // 1 كيلو سردين مغسول ، ملح ، نصف كأس من الزيت ، مزيودات ، نشرملو السردين بهاد المكونات و نشدو عليه في الكوكوط لمدة 10 دقائق و من بعد نوضعوه في قراعي ديال الزجاج و نضيفو أوراق الزعتر و الزيت كيجي منسم و لذيذ.

* يسرا من الناظور : الطون أو سمك " الماكارو "// 1 كيلو من الطون مقطع فيلي ، نصف كأس من الخل ، نصف كأس من الماء ، 1 كأس زيت المائدة ، مزيودات حسب الاختيار ، نشرملو الحوت و نسدو عليه لمدة 15 دقيقة حتى يطيب و نوضعوه في علب و ندخلوه للثلاجة بالصحة و الراح